រដ្ឋមន្ដ្រីក្រសួងមហាផ្ទៃបានប្រកាសឲ្យដឹងថា អង្គការហ្វាត (FATF) បានសម្រេចដកប្រទេសកម្ពុជាចេញពីបញ្ជីប្រផេះហើយ។
សម្ដេច ស ខេង លើកឡើងបែបនេះ នាឱកាសអញ្ជើញបើកសន្និបាតត្រួតពិនិត្យលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងមហាផ្ទៃ នាថ្ងៃទី២២ ខែកុម្ភៈ ឆ្នាំ២០២៣ នៅសណ្ឋាគារសុខាភ្នំពេញ។
សម្ដេចក្រឡាហោម ស ខេង បានលើកឡើងថា «តាមរបាយការណ៍របស់ ឯកឧត្តម កើត រិទ្ធ រដ្ឋមន្ដ្រីក្រសួងយុត្តិធម៌ បានឲ្យដឹងថា មហាសន្និបាតនៃអង្គការ FATF កាលពីថ្ងៃទី២១ ដែលកិច្ចប្រជុំត្រៀមបំរុង សម្រាប់ថ្ងៃទី២៤ នោះ គឺបានសម្រេចដកកម្ពុជាចេញពីបញ្ជីប្រផេះ។ ប៉ុន្ដែប្រកាសជាផ្លូវការតាមព័ត៌មាន គេនឹងធ្វើម៉ោង១០ (ម៉ោងនៅកម្ពុជា) នៅថ្ងៃទី២៣ ខែមីនា ឆ្នាំ២០២៣ យើងរងចាំព័ត៌មាននេះទាំងអស់គ្នា»។
សម្តេចលើកឡើងថា ដំណឹងនេះពិតជាល្អសម្រាប់កម្ពុជាហើយ ប៉ុន្តែស្របពេលជាមួយនឹងអ្វីដែលទទួលនេះក៏មិនត្រូវភ្លេចខ្លួនផងដែរក្នុងការបន្តការពារកម្ពុជាក្នុងកិច្ចសហការជាមួយអង្គការ FATF ។
សម្ដេចក្រឡាហោមបានបន្ដថា «បន្ទាប់មកទៀត គឺមិនត្រូវភ្លេចខ្លួន ក្នុងការកិច្ចសហប្រតិបត្តិការនានានោះទេ ផ្ទុយទៅវិញ គឺខិតខំប្រឹងប្រែងបន្ថែមទៀត ព្រមទាំងរួមសាមគ្គីគ្នាទាំងថ្នាក់ជាតិ និងថ្នាក់ក្រោមជាតិ ដើម្បីបន្ដការពារឲ្យបានដាច់ខាតនូវលទ្ធផលដែលខិតខំជាមួយអង្គការ FATFនេះ» ។
សូមរំលឹកថា អង្គការ FATFដែលមានមូលដ្ឋាននៅទីក្រុងប៉ារីស ប្រទេសបារាំង កាលពីថ្ងៃទី៤ ខែមីនា ឆ្នាំ២០២២ បានសម្រេចបន្តដាក់កម្ពុជាស្ថិតក្នុង «បញ្ជីប្រផេះ» នៃក្រុមប្រទេសមានហានិភ័យខាងអំពើលាងលុយកខ្វក់ដែលពិភពលោកត្រូវបង្កើនការតាមដាន៕
ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា នៅយប់ថ្ងៃទី២៤ ខែកុម្ភៈ ឆ្នាំ២០២៣ បានបង្ហោះសារតាមផេកផ្លូវការរបស់ខ្លួន អបអរសាទរកម្ពុជា ដែលត្រូវបាន FATF សម្រេចដកចេញពីបញ្ជីប្រផេះ។
ឯកឧត្តម ស សុខា បានសរសេរយ៉ាងដូច្នេះថា ៖ ក្នុងនាមពលរដ្ឋខ្មែរមួយរូប ឯកឧត្តមពិតជាមានក្តីរំភើបរីករាយយ៉ាងក្រៃលែង បន្ទាប់ពីទទួលដំណឹងថា ក្រុមការងារហិរញ្ញវត្ថុអន្តរជាតិប្រឆាំងការសម្អាតប្រាក់ ឬ “FATF” បានបង្ហាញព័ត៌មានជាផ្លូវការនៅលើគេហទំព័រ(Website) របស់ខ្លួន ដោយបញ្ជាក់ថាកម្ពុជាយើងលែងស្ថិតនៅក្នុងបញ្ជីប្រផេះទៀតហើយ ។
ឯកឧត្តម ស សុខា បានបន្តថា លទ្ធផលដ៏អស្ចារ្យមួយនេះ កើតឡើងពីការខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា គឺសម្តេចអគ្គមហាសេនាបតីតេជោ ហ៊ុន សែន ក៏ដូចជាថ្នាក់ដឹកនាំក្រសួង ស្ថាប័ន អង្គភាពពាក់ព័ន្ធផ្សេងៗទៀត នៃព្រះរាជាណាចក្រកម្ពុជា ជាពិសេសការវាយតម្លៃផ្ទាល់ពី FATF ។
ក្នុងសារអបអរដដែល ឯកឧត្តម ស សុខា បានបន្តទៀតថា ការប្រកាសដកកម្ពុជាចេញពីបញ្ជីប្រផេះជាផ្លូវការនេះ បានធ្វើឡើងបន្ទាប់ពីមានសេចក្តីសម្រេចចិត្តរបស់ក្រុមការងារ ICRG របស់ FATF ក្នុងការដកកម្ពុជាពីបញ្ជីប្រផេះ កាលពីថ្ងៃទី២០ ខែកុម្ភៈ ឆ្នាំ២០២៣ ដោយមិនមានសមាជិកណា ចេញមុខជំទាស់ការដកកម្ពុជាចេញពីបញ្ជីប្រផេះនោះទេ។
ផ្ទុយទៅវិញកម្ពុជាយើងទទួលបានការគាំទ្រពីសមាជិករបស់ FATF ចំនួន ១៨ ស្ថាប័នអន្តរជាតិ ចំនួន ២ (APG និង EU Commission) និងប្រទេសសមាជិក ចំនួន ១៦ ទៀតដូចជា ៖ អូស្ត្រាលី ដាណឺម៉ាក ហ្វាំងឡង់ ឥណ្ឌា អាមេរិក អាល្លឺម៉ង់ ចិន រុស្ស៉ី អ៊ីតាលី ជប៉ុន ម៉ាឡេស៊ី នូវែលហ្សេឡង់ ព័រទុយហ្កាល់ អង់គ្លេស កូរ៉េខាងត្បូង និងសិង្ហបុរី ជាដើម៕
អត្ថបទ ៖ សេង បូលីន
ប្រភព ៖ Page : Sar Sokha
0 Comments